Babae Kami by Marra PL. Lanot

Babae kami
Hindi pagkaing
Sa mesa ihahain
Babalatan, hihimayin
Pampuno ng tiyan
o bagay lang sa basurahan.

Babae kami
Hindi manikang
Lalaruin, huhubaran
Bibihisan, ikukulong
Sa kuna o ididispley
Sa eskaparate.

Babae kami
Hindi lupang
Dudungkalan ng tanso
Hiyas at ginto
Tatamnan at iiwanan
Pagkatapos ng anii
Hahayaang magputik
Aapak-apakan o gagawing
Kandungan ng mga kalansay.

Babae kami
Tao rin naman
Hindi robot o basahan
Hindi kaserola o kubeta
Hindi panaginip na walang isip
O imahen na hahabulin
Sa lumilipad na ulap.

Babae kami
Nagluluwal ng sanggol
Na tagapagmana ng mundo
Marunong kaming umaninag
Ng hugis sa araw at gabi
Marunong maghimay
Ng kulay ng bahagari
Marunong sumalo
Sa kaluluwang babagsak
Marunong magmahal
Sa pusong maalalahanin
Marunong lumaban
At magwasto ng baligtad
Habang naghahardin
Sa ikakaganda ng daigdig.

*Taken from Filipina I Poetry, Drama, Fiction by Women Writers in Media Now 1984